Wus ndungkap telulas candra
Lintang panjerina setya ngancani
Gilap, endah, nyengsemke ati
Polatanmu kadya Wara Srikandhi
Prigel ndudut ati, paring daya kekuatan
Pangandikamu alus yayah Dewi Wara Sembadra
Nggugah nggonku turu marak enjang
Tan lali sliramu tadhah paring pamuji
Jumurung muga kabeh sedyaku kasembadan becik
Nanging, ing surup pungkasaning warsa
Bebarengan mijiling mangsa udan
Mendhung lelimengan, nutupi wiyati
Nyirnakake endahing purnama lan kartika
Lintang panjerina ilang saka panggonan
Ndhelik ing gigiring mendhung
Wiwit kuwi, aku kelangan wong kang daktresnani
Wiwit kuwi aku kelangan daya kekuatan
Muga enggal ganti mangsa
Lintang panjerina enggal katon paweh sesanti adi
Kreator : Sali
Comment Closed: LINTANG PANJERINA
Sorry, comment are closed for this post.